زواجة الثانية (الحلقة 3)
كلنا نعلم ان زواجة الثانية اليوم تشتي ضمار، لأن ما عادبش زواجة اولى عريطي عاد الزواجة الثانية ،ولا ننسى دور الركبة في الموضوع، لان علاقة الضمار بالركبة علاقة طردية ، لكنها علاقة طردية من طرف واحد، يعني الركبة مالهاش دخل من زيادة الضمار او نقصة، ولكل قاعدة شواذ.
زواجة الثانية مثلما واحد ضابح من نفسه قلت له : الله يزوجك، قال : لاااا بس كفاية، قلت له : ليش ؟ غريبة، فانت من اليمنيين النادرين الذين يرفضوا هذه الدعوة، قال: كودنا بالاوله ،عاد شاتحملني فوق الحطب كدمه.، قلت له : هوذا العرب زمان كانوا يزوجوا اكثر من واحده، وانا اعجبني مجبارة اطلع مافي راسه، قال: العربي زمان كان يروحها للخيمة، ما اليوم هي تشتي شقة، العربي زمان كان يلقطها من خيمة ابوها لا خيمته، ما اليوم تشتي صالة و كوافيره وزفة، العربي كان يزوج بالفاتحة، اما اليوم ما يفتح ابوها لقفه الا وكل كلمة بمليون.. ومازال يعدد حتى قلت ليته سكت ..
فمتطلبات الزواجة الثانية كثيرة ،وعاد تشرطات الاولى ترجع من جديد وكأنها تفرمتت وحملت نظام جديد و تطبيق " ادلنا.. ماعدبش معنا" .
في الحكاية قالوا ان واحد عجزت مرته وهو عاده بروحه ماله شي، فسمحت له ان يتزوج عليها لانها ما عاد بش فيها ولا قناة لمواجهة متطلباته الجنسية، فسعت العجوز في زواجه من الثانية، و الراجل ارتاح و جلس مع الزوجة الثانية فترة، الا والاولى بدات تسأل عليه وتشتكي انه ما عاد بيجي عندها، فتروح ليلة عندها، ووصل يرقد، قالت له : رجال قوم قوم، او تشتي ترقد، فاستغرب الرجال و قال : فانا ما تزوجت الا حين ماعادش قادره لشي، قالت : ايوه، ماعاد انا قادره لشي و لا اشتي شي، فقال : فما تشتي مني؟، قالت : قوم ادي حقي لا يدي...
و القصة هنا توحي لنا ان الغيرة تخرج ذي ما يخرج، و ان متطلبات الحياة تزداد كثيرا، وانت تشتي تراضيهن و طلباتهن ما تنتهي..
مثل صاحب عمران ذي تزوج ثنتين ،واحده من قرية حمده و واحده من قرية الخدره، فكانت صاحبة الخدرة تسمعه في الصلاة يقول : سمع الله لمن حمده، قالت له ما بلا يعدل و الا يعدل بينهن ، قال : في ايش اعدل، قالت : كون مرة قول سمع الله لمن حمده و الثانية تقول سمع الله لمن خدره..
فاذا نويت على الثانية و سع قلبك، ولا تظن ان الوساع في القلوب في هذا الشي، الزواجة مش هي باص نتلازز فيه، في الزواجة الوساع في الجيوب.. يعني جهز لنفسك ضمار.. ولا تحاكي مرتك الاوله انك ناوي تتزوج، فما تدري الا وهي تخرج لك المشاريع الوهمية، وتبين لك نواقص البيت والمطبخ، وماتدري الا والمقاضي بتنتهي كل اسبوعين بعدما كانت تكفيك شهرين، وتبدأ ترعى اليتامى والارامل و المساكين على حسابك.. يعني اذا اردت ان تتزوج فاجعل زواجتك مثل موت الفجأة.. طق طق و انها في البيت..
*يتبع غدا في الحلقة الاخيرة
الكاتب عمار قائد التام
#تخديرة🩺
تعليقات
إرسال تعليق